काठमाडौँ । नेपाल–चीन जोड्ने उत्तरी नाका तातोपानी हुँदै भन्सार छली भित्र्याइएका लाखौँ मूल्यका अवैध चकलेट र सस सशस्त्र प्रहरी बलले नियन्त्रणमा लिएको छ।
बिज्ञापन
सशस्त्र प्रहरी बल नेपाल १६ नम्बर गण हेडक्वाटर बन्देउले सोमबार राति खाडिचौरतर्फ आउँदै गरेको बा४ख ५८६४ नम्बरको सानो भ्यान जाँच गर्दा बिल–बिजक तथा भन्सार प्रज्ञापन पत्रविनाका सामग्री फेला पारेको हो। बरामद चकलेट र ससको अनुमानित मूल्य ७ लाख २२ हजार १० रुपैयाँ रहेको सशस्त्र प्रहरी जनाएको छ।
बिज्ञापन
बाह्रबिसे नगरपालिका–४ स्थित बाह्रबिसे बजार क्षेत्रमा गरिएको चेकजाँचका क्रममा भन्सार छलि ल्याइएका ती सामग्री, भ्यान र चालकलाई नियन्त्रणमा लिइएको हो। सशस्त्र प्रहरी बल नेपाल लामोसाँघु बेसबाट खटिएको टोलीले बाह्रबिसे नगरपालिका–६ मान्द्राका चालक शिवलाल तामाङलाई समेत नियन्त्रणमा लिएको प्रहरी उपरीक्षक अच्युत मजगैयाँले जानकारी दिए। उनका अनुसार चालक तामाङले बरामद सामान आफ्नो भएको दाबी गरेका छन्।
सशस्त्र प्रहरीले बरामद सामग्री, सवारी साधन र चालकसहित कुल २२ लाख २२ हजार १० रुपैयाँ बराबरको विवरण आवश्यक कारबाहीका लागि तातोपानी भन्सार कार्यालयलाई जिम्मा लगाएको जनाएको छ। उत्तरी नाकाबाट हुने अवैध कारोबार नियन्त्रणका लागि निगरानी थप कडा बनाइएको सशस्त्र प्रहरीको भनाइ छ।
बिज्ञापन
