एक जना लेखा अधिकृतको काँधमा ६ वटा कार्यालय रहेको पाइएको छ ।दरबन्दी अनुसारको लेखाको अभावका कारण प्रदेश लेखा इकाई कालीकोटले लेखा अधिकृत विश्वामित्र उपाध्यायलाई ६ वटा कार्यालयको जिम्मा दिइएको छ ।
बिज्ञापन
कर्णाली प्रदेश सरकार अन्तरगतका कालीकोटमा १० वटा कार्यालय भए पनि दरबन्दी अनुसारका लेखा अधिकृत नहुँदा एकै जना अधिकृतको काँधमा प्रदेशका ६ वटा कार्यालयको जिम्मेवारी सम्हालिरहेका छन् उपाध्यायले ।
बिज्ञापन
प्रदेश सरकारको संगठन तथा ब्यवस्थापन सम्वन्धी ऐनमा पद स्थापना र कार्यविभाजन अनुसार प्रत्येक कार्यालयमा आवश्यक जनशक्ति दरबन्दी अनुसार राखिनु पर्ने भए पनि कालीकोटमा प्रदेश सरकार अन्तरगतका कार्यालयमा लेखाको दरबन्दी नुहँदा एउटै अधिकृतलाई कामको भार परेको छ ।
लेखा अधिकृत विश्वामित्र उपाध्यायको प्रदेश लेखा इकाई कालीकोटमा दरवन्दी छ । तर लेखाको दरवन्दी अभावका कारण उपाध्यायले हाल डिभिजन वन कार्यालय,सामाजिक विकास कार्यालय,कृषि विकास कार्यालय,प्रदेश लेखा ईकाइ,उद्योग तथा उपभोक्ता हित संरक्षण कार्यालय र पशु अस्पताल तथा पशु सेवा कार्यालय गरी ६ वटा कार्यालयको जिम्मेवारी सम्हालिरहेका छन् ।
उपाध्यायका अनुसार विभिन्न ६ वटा कार्यालयमा गई कामकाज गर्ने वातावरण नभएका कारण आफूले एउटै कार्यालयमा फरक–फरक समयमा प्रत्येक कार्यालयको काम गरिरहेको जनाएका छन् ।
यसरी एउटै लेखा अधिकृतले आन्तरिक लेखा परीक्षण र बजेट निकासा पनि आफैँले लिने गर्दा स्वार्थ जोडिएको प्रश्न समेत उठ्दै आएको छ । कार्यालयले लेखाको दरबन्दी समेत माग नगर्नुले कार्यलय प्रमुख र लेखा अधिकृतबीचको स्वार्थले काम गरेको हुन सक्ने टिप्पणी समेत हुँदै आएको छ ।
बिज्ञापन
