कर्मचारीहरुले वैदेशिक भ्रमणमा जानका लागि के सम्म गर्दछन् भन्ने एक पछाडि अर्काे उदाहरण छरपष्ट हुँदै छ । स्पेनको वार्सिलोनामा फागुन १९ देखि २२ गतेसम्म भएको ‘मोबाइल वर्ल्ड कंग्रेस’ मा सहभागी सञ्चार सचिव राधिका अर्यालसहितको सरकारी टोली त्यहाँ पुग्यो तर सचिव सम्बन्धित कार्यक्रममा नबस्दा आलोचित भइन ।
बिज्ञापन
यो प्रकरण सेलाउन नपाउँदै स्पेनकै भ्रमणमा निस्किएका नेपाल सरकारका एक सहसचिव र अर्काे उपसचिवको भ्रमण समेत विवादमा परेको छ । कर्मचारीको भाग खोसेर सहसचिव र उपसचिवहरुले आ आफ्ना पत्नीलाई स्पेन भ्रमणमा लगेको बिषय बाहिरिएसँगै उनीहरुको भ्रमण समेत विवादमा परेको हो । सरकारी निकायले निकटस्थ व्यक्ति तथा असम्बन्धित कर्मचारीलाई विदेश भ्रमणमा लैजाने गरेको बिषय कुनै नौलो होइन । यस अघि नेपाल निजामती कर्मचारी युनियनका अध्यक्ष गोपाल पोखरेलले अरु कर्मचारीको भाग काटेर आफ्नी पत्नी बोकेर विदेश पुगेको बिषय हामीले प्रकाशन गरेका थियौं । शक्ति र सत्तामा भएका कर्मचारीहरुले मनपरी तवरले वैदेशिक भ्रमणमा नातापाता लैजादै आएका छन् ।
बिज्ञापन
पछिल्लो समय म्यानपावर व्यवासायी,व्यापारी र विचौलियाको पक्षपोषणमा हुने गरी एक पछि अर्काे निर्णय गरेर विवादमा तानिएका छन् श्रम मन्त्री ।मन्त्रीमात्र होइन,उनका यस अघिका दुई स्वकीयले समेत अख्तियारको दुरुपयोग गर्दै पत्नीलाई बोकेर वैदेशिक भ्रमणमा निस्किएको खबरले अहिले सामाजिक सञ्जालदेखि श्रम मन्त्रालय तातेको छ । केही महिना अगाडि मन्त्री शरदसिंह भण्डारी आफ्ना पूर्व दुई पिएका दम्पत्तिसहित विदेश शयरमा निस्किएको भेटिएको हो । कर्मचारी तथा सरोकारवालाहरुको भाग खोसेर मन्त्री,सहसचिव र उपसचिवहरु आफ्ना दम्पत्तिसहित स्पेन पुगेर फर्किएका हुन । यसरी दम्पत्ति सहित वैदेशिक भ्रमणमा लगेका दुबै सहसचिव र उपसचिव मन्त्री भण्डारीका दाहिने हात हुन । उनीहरु दुबै मन्त्रीको पिएको रुपमा सघाउँदै आएका कर्मचारी हुन ।
बिज्ञापन
स्पेनको म्याड्रिडमा सम्पन्न टुअवार्ड अ लेभर इन्टरनेशनलमा सहभागी हुन श्रम मन्त्री शरदसिंह भण्डारी,सहसचिव तथा वैदेशिक रोजगार विभागका महानिर्देशक सूर्यबहादुर खत्री,हाल साउदी अरवका श्रम काउन्सेलरका रुपमा कार्यरत कविराज उप्रेतीहरुको टोली आ आफ्ना श्रीमतीसहित त्यता गएर फर्किएको भेटिएको छ ।
मन्त्री भण्डारीले पत्नी निर्जला राउतलाई समेत उक्त कार्यक्रममा साथै लैजाने तयारी अगाडि बढाएका थिए तर निर्जला भने छोरीको विववाहको तयारीका लागि भन्दै उक्त कार्यक्रममा गइनन् तर सहसचिव सूर्यबहादुर खत्रीले पत्नी मिठ्ठु थापा,कविराज उप्रेतीले पत्नी शोभा रिजाललाई उक्त कार्यक्रममा साथै लगेको खुलेको छ । उक्त मन्त्रालयको वैदेशिक शाखा हेर्ने शाखा अधिकृत आयुषी भट्टराई पनि उक्त कार्यक्रममा सहभागी भएको भेटिएको छ ।
जानकारहरुका अनुसार मन्त्रालयको पत्रमै भिषा सिफारिसको लागि पत्र लेख्नु अख्तियारको दुरुपयोग हो । वैदेशिक भ्रमण खर्च नियमावली ०६४ र वैदेशिक भ्रमण निर्देशिका २०७५ विपरित भएको अर्थ मन्त्रालयका एक सहसचिवले प्रतिक्रिया दिएका छन् ।
स्मरण रहोस यसरी मन्त्रीले साथै च्यापेर लगेका सूर्य खत्री कुनै समय मन्त्रीकै नीजि सचिवका रुपमा काम गरिसकेका कर्मचारी हुन । उनी यस अघि प्रमुख जिल्ला अधिकारीको भूमिकामा थिए । खत्रीलाई गृहबाट श्रममा तानेर अहिले वैदेशिक रोजगार विभागको महानिर्देशक बनाइएको छ । सोही विभाग मातहतबाट दैनिक रुपमा सत्तरी लाखसम्म घुस असुली भइरहेको बिषयमा पूर्व मन्त्री डिपी अर्यालले संसदमै कुरा उठाएका छन् तर यो प्रकरणमा मन्त्रालयले कुनै चासो र अग्रसरता लिएको छैन । उता मन्त्री भण्डारीको दाहिने हात मानिएका कविराजलाई यस अघि उनै डिपी मन्त्री हुँदा इटहरी पठाएका थिए तर शरदसिंह मन्त्री बनेसँगै पुन मन्त्रालयमा तानेर आफ्नो पिएमात्र बनाएनन् पछि त उनलाई साउदी अरवको श्रम काउन्सेलरमा नियुक्ति गरिएको छ ।
