पछिल्लो समय मन्त्रीका सचिवालयबाट कर्मचारीहरु नै आजित र हैरानी खेप्न थालेका छन् । मन्त्रीहरुको सचिवालय हेर्ने गरी नीजि र स्वकीय सचिवको व्यवस्था गरिएको हुन्छ । यसरी राखिएका सचिवालयका कर्मचारीहरु गर्नुपर्ने काम नगर्ने तर नगर्नु पर्ने काम गर्दा बदनामी खेप्दै आएका छन् ।
यस्तै सचिवालयका कारण वेदागी भनिएका स्वास्थ्य तथा जनसंख्या मन्त्री प्रदीप पौडेल समेत विवाद र लफडामा मुछिने सिलसिला जारी छ । सरकारका मन्त्रीहरूको दैनिक कार्यमा सहयोगको लागि सरकारी कर्मचारीहरूको टिम भएको निजी सचिवालय तथा मन्त्रीले इच्छाइएका व्यक्तिहरू भएको स्वकीय सचिवालयको कानुनी व्यवस्था छ।
बिज्ञापन
सोही व्यवस्था अनुसार मन्त्री पौडेलका सचिवालयमा ९ सदस्यीय कर्मचारी कार्यरत रहेका छन् । तिनै सचिवालयका कर्मचारीहरुका कारण सर्वसाधरणमात्र होइन उपसचिवदेखि सहसचिव तहसम्मका कर्मचारीहरु हैरानी खेपिरहेका छन् ।
बिज्ञापन
निजी सचिवालयमा उपसचिव वा सो सरहको कर्मचारीको नेतृत्वमा अधिकृत, नायव सुब्बा, कम्प्युटर अपरेटर, कार्यालय सहयोगी र सवारी चालक समेत गरी कम्तीमा पाँच जनाको टिम र स्वकीय सचिवालयमा मन्त्रीबाटै नियुक्त उपस्वकीय अधिकृत (उपसचिव सरह) सहित स्वकीय अधिकृत, एक स्वकीय प्रशासन सहायक, हलुका सवारी चालक दुई तथा कार्यालय सहयोगी दुई जनाको गरी राज्यकोषबाट तलब भत्ता पाउने गरी सात जनाको स्वकीय सचिवालय हुन्छ।
त्यही सचिवालयको कार्यशैली कारण स्वास्थ्य तथा जनसंख्या मन्त्रालयमा गुनासो चुलिँदै गएको छ । यिनै कर्मचारीले सहसचिवको गाडी तानेर चढेकोदेखि सरुवामा व्यापक चलखेल गर्दै आएको गुनासो छ । मन्त्रीको निजी सचिव छन्,उपसचिव शालिकराम दाहाल र शाखा अधिकृत विश्वविन्धु रेग्मी । यसअघि गगन थापाको सचिवालयमा बसेका दाहालले नै हो सहसचिवको गाडी खोसेर आफैं चढ्न थालेको । प्रधानमन्त्री केपी शर्मा ओलीले आफ्नो निजी सचिवमा स्वास्थ्य मन्त्रालयबाट विनोद कुँवरलाई लगेपछि उनले चढ्दै आएको अत्याधुनिक गाडी जनसंख्या सचिव ढुण्डी निरौलाले प्रयोग गर्दै आएका थिए तर निजी सचिवले सहसचिवको सोही गाडी चलाउन थालेका छन् । निरौलालाई पिक अप, थोत्रो गाडी हुँदै हैरान पारिएपछि यो बिषयमा भर्खरै सेवानिवृत्त सचिवहरु रोशन पोखरेलदेखि हरि मैनालीसम्मलाई दुखेसो पोख्न पुगे । स्रोतका अनुसार मन्त्रीको सचिवालयसँग तिनले पङ्गा लिन सकेनन् र निरिह ठहरिए ।मन्त्रीको सचिवालयबाट चेपिएका निरौला पठाओ चढेर दैनिक गौरीघाट–रामशाह पथ आउजाऊ गरिरहेका छन् ।
बिज्ञापन
मन्त्रीका आसेपासेले खाने,लेखाले भुक्तानी नदिने ! यस्तो हुँदा त्यहाँ अर्काे लफडा चुलिएको छ । मन्त्रीको सचिवालयमा कार्यरत कर्मचारीहरुले गत माघ महिनामा मात्र चिया र खाजा शीर्षकमा एक लाखभन्दा बढी सकाए । स्वास्थ्य मन्त्री प्रदीप पौडेलको सचिवालयमा कार्यरत ८ कर्मचारीले खाएको चियाचमेना वापत गएको बील लेखाले भुक्तानी गर्न नसकिने अडान लिएपछि अहिले कर्मचारीबीच द्धन्द शुरु भएको छ ।
उता विश्ववन्धु रेग्मी भने मन्त्रीलाई मावली नाता लगाउँदै स्वास्थ्यमा छिरेका हुन् । ०५५ सालदेखि जागिरे यात्रा शुरु गरेका उनी मकवानपुरको फर्पिङ गाउँपालिका (हाल थाहा नगरपालिका) मा कार्यरत थिए । पानी बढुवा हुँदै सुब्बा पदबाट शाखा अधिकृतमा उक्लिएका उनी स्वास्थ्य सेवा विभाग, टेकु हुँदै उद्योग विभागमा पुगे । बीचमा झण्डै झण्डै माओवादी बनेका उनले वैदेशिक रोजगार,स्वास्थ्य सेवा विभाग, उद्योग विभागजस्ता कमाउ अड्डामा बसेर स्वयम्भू नजिकै गज्जबको घर ठड्याएका छन् ।
