राजपरिवारको नाममा रहेका हजारौंका संख्यामा रहेका करोडौं मूल्यका तक्मा अहिले कहाँ र कुन स्थितिमा छ ? ती सग्लै छन कि सरकारी कर्मचारीहरुले मिलेर बेचेर खाइसके ? यो बिषयमा सरकारी निकायहरु नै अनविज्ञ छन् । राजदरबारको नाममा रहेका जग्गाहरु नेपाल ट्रष्टले हेर्दै आएको छ । ट्रष्टसँग यी तक्मा र विभूषणका कुनै विवरण हुने कुनै भएन । तक्मा र विभूषण वाढ्दै आएको गृह मन्त्रालय मातहत विभूषण शाखा छ, उक्त शाखा हेर्ने एक कर्मचारीका अनुसार, मानपदवी, अलंकार र पदक २०६४ सालमा व्यवस्थापिका संसद्ले विभूषणसमन्बन्धी ऐन बनाएपछिका र बुझ्न बाँकी २८४ तक्मामात्र गृहसँग छ । दरबारको तक्मा गृहसँग नरहेको त्यहाँका उच्च अधिकारीहरुले पृष्टि गरेका छन् । पुरातत्व विभागसँग पनि यी तक्माहरु छैनन् । उसो हो करोडौं मूल्य पर्ने सुन,हिरा,मोति जडित हजारौं संख्याका यी र यस्ता सम्पत्तिहरु अहिले कहाँ र कुन हालतमा छन् ?
कर्मचारी प्रेसले सोध खोज गर्दै जाँदा यी सामाग्रीहरु संघ सरकार मातहतका कुनै कार्यालय सँग नरहेको र बाग्मती प्रदेश मातहतको एउटा कार्यालयले राखेको भेटियो । यी र यस्ता महत्वपूर्ण सम्पत्ति गृह,पुरातत्व लगायतका संघीय कार्यालय अर्थात गृहकै विभूषण शाखामा नराखेर किन प्रदेश मातहतका कार्यालयमा राखिएको होला ? अहिले दरबारको नाममा रहेका जति पनि तक्माहरु छन्,पाटन औद्योगिक क्षेत्रभित्र रहेको उद्योग तथा वाणिज्य कार्यालयमा पोका पारेर राखिएको पाइएको छ । यही कार्यालयले हो तक्माहरु बनाउँदै आएको । उक्त कार्यालयको अभिलेख अनुसार राजपरिवारको नाममा रहेका विविध १८९ थरीका तक्माका हजारौं परिणाम ०७१ साल साउन १४ देखि पाटन औद्योगिक क्षेत्रभित्र राखिएका छन् । जसमा महेन्द्रमाला १ थान ,नेपाल प्रताप भाष्कर २ सेट,नेपाल प्रताप भाष्कर स्वल्पाकार १० सेट,नेपाल प्रताप भाष्कर ५ थान,महागौरव तेजश्वी त्रिभुवन श्रीपद पहिला २ थान, महागौरव तेजश्वी त्रिभुभवन श्रीपद पहिला स्वल्पकार ४ लगायतका विभिन्न सामानहरु अहिले उक्त कार्यालयका नयाँ, पूराना,भाचिएका दराजमा पोका पारेर राखिएको अवस्था छ । र रोचक चाहिँ ती पोकामा नभई कार्यालयको ढोकामा सिल हानेर ती सामाग्री सुरक्षित रुपमा राखिएको कार्यालयको दावी छ ।
तर,अहिले कसैको चाँसोमा नपरेको यी महत्वपूर्ण तक्मामा जडीत सुन, चाँदी र हिराहरु निकालेर नक्कली तक्मा बनाएर अहिले स्टोरमा सिल गरेर राखिएको भन्दै उजुरी अख्तियार दुरुपयोग अनुसन्धान आयोगसम्म पुगेको छ । अख्तियारमा हालिएको उजुरीमा राजपरिषद्को नाममा रहेको २२ थान ब्रेचपीन २२ थानको सुन,चाँदी निकाली नक्कली तक्मा बनाइ सक्कली तामाबाट सुन निकाली करोेडौंको सम्पत्ति हिनामिना भएको र यो प्रकरणमा कार्यालय प्रमुख,लेखा र स्टोरका कर्मचारीहरुको मिलेमतो रहेको जिकिर गरिएको छ । यद्यपि अख्तियारले यो बिषयलाई तामेलीमा राखेको छ । कार्यालयकै तल्ला तहका केही कर्मचारीका अनुसार २२ थानमात्र होइन धेरै तक्माहरुबाट यसैगरी सुन,हिरा निकालेर हिनामिना भएको छ । यस्तो लुट हुँदा समेत कुनै निकायले गम्भीर रुपमा खोजविन गरेका छैनन् । सिल गरिएका ती तक्माबाट १५ करोड भन्दा बढीको सुन निकालेर गोलमाल गरिएको कार्यालयका कर्मचारीहरुले बताएका छन् ।
बिज्ञापन
अहिले बाग्मती प्रदेशको उद्योगमन्त्रीको भाञ्जा सन्तोष मोक्तानलाई त्यहाँ लगिएको छ । बाग्मती प्रदेश उद्योगका कर्मचारीहरुका लागि यो भन्सारजस्तै हो । एक बर्ष अघि उक्त कार्यालयको कुर्सीमा पुगेका यादव अचार्यलाई त्रिपुरेश्वरतिर खेदेर त्यहाँ बाग्मती प्रदेश उद्योग मन्त्री शुकमाया तमाङ्गको नातेदार सन्तोष मोक्तानलाई कार्यालय प्रमुख बनाएर खटाइएको छ । २१ कर्मचारीको दरबन्दी रहेको उक्त कार्यालयमा अहिले विभूषण तथा तक्मा निर्माणको काम गरिरहेको छ । सुनको तक्मा बनाउँदा झण्डै २ प्रतिशत अर्थात २५ ग्राम हिनामिना हुँदै आएको बताइन्छ । बिल २४ क्यारेटको बनाएर २२ क्यारेटको सुन हाल्ने काम त्यही हुने कर्मचारीहरु नै जिकिर गर्दछन् । विभूषणमा जडित सुन, हीरा र चाँदी जडित हुन्छन् । सबैभन्दा उपल्लो पदक मानिने ‘नेपाल रत्न’ बनाउन करिब ४० लाख रुपैंया लाग्ने गृहका अधिकारीहरु बताउँछन् । सरकारले २०६८, २०७२, २०७४ मा तक्मा वितरण रोकेको थियो । अघिल्लो पटक नारायणकाजी श्रेष्ठ गृहमन्त्री हुँदा ०८० र २०८१ सालमा विभूषण वितरण गरेको थिएन । यस बर्ष यो प्रक्रिया फेरि अगाडि बढाइएको छ ।
बिज्ञापन
