अकुत आर्जन गर्ने र श्रीसम्पत्ति ससुराली,सालीदेखि गर्लफ्रेण्डका नाममा लुकाउने एकपछि अर्का भ्रष्ट कर्मचारीको सम्पत्ति राज्यले जफत गर्ने काम बल्ल अगाडि बढेको छ । गृह मन्त्रालय मातहतको कसुरजन्य सम्पत्ति व्यवस्थापन विभागको महानिर्देशकको कुर्सीमा सुरेश पन्थी पुगेसँगै विभागले भ्रष्ट नेता तथा कर्मचारीद्धारा आर्जित सम्पत्ति जफत गरी राज्यमातहत ल्याउने प्रस्ताव क्याविनेटमा पठाउन लागिएको हो । सम्भवत विहिबार वा त्यसपछिको क्याविनेटमा यो प्रस्ताव लैजान लागिएको गृह मातहतको कसुरजन्य विभागले जनाएको छ । अहिले त्यस्का लागि ५ जना शाखा अधिकृतको फरक फरक समिति बनाएर लगत संकलनको काम गरिरहेका छन् ।
बिज्ञापन
कार्यालयका अनुसार भ्रष्टाचार मुद्धामा दोषी ठहर भएका कर्मचारीहरुको विवरण,उनीहरुको चल अचल सम्पत्ति खोज्न टिम परिचालन गरिएको छ । विशेष अदालत ,फैसला कार्यन्वयन निर्देशनालय,नेपाल राष्ट्र वैक,यातायात व्यवस्था विभागसँग भ्रष्ट कर्मचरीहरुबाट जफत गर्नुपर्ने सम्पत्तिको रेकर्ड लिने काम तिव्रतर गतिमा चलिरहेको छ ।
बिज्ञापन
यसरी सम्पत्ति जफत गर्न लागिएकामध्ये भ्रष्टचारी प्रमाणीत भएका नासुदेखि सहसचिवस्तरसम्म कर्मचारी र पूर्व मन्त्री समेत रहेककाछन् ।जसमा वीरगञ्ज भन्सारका नासु केदारनाथ ढुंगाना, आन्तरिक राजश्वका नासु उमेशकुमार रेग्मीदेखि जल उत्पन्न प्रकोप नियन्त्रण विभागका तत्कालीन डिजी अजितकुमार मिश्र, आन्तरिक राजश्व विभागका डिजी मुरारी कार्की, भौतिक पूर्वाधार मन्त्रालयका सहसचिव आनन्दप्रसाद खनाल,रामज्ञा चर्तुेवेदी,केशरजङ्ग खड्का,सरिता गिरी,केदारनाथ ढुङ्गना लगायतका वादीका नाममा रहेका चल अचल सम्पत्ति जफत गरेर राष्ट्रियकरण गर्ने तयारी अन्तिम चरणमा पुगेको कार्यालयले जनाएको छ ।
बिज्ञापन
कसूरजन्य सम्पत्ति व्यवस्था विभागका अनुसार अकुत आर्जनमा डामिएर भ्रष्टाचार मुद्दामा दोषी ठहर भएका सडक विभागका पूर्वमहानिर्देशक आनन्दप्रसाद खनालको भक्तपुरस्थित ६५ आना जग्गा सरकारले जफत गरिसकेको छ । उक्त सम्पत्ति सरकारीकरण गर्ने प्रक्रिया अहिले अगाडि बढाइएको हो । खनालले गैरकानुनी ढङ्गबाट आर्जित सम्पत्ति श्रीमती पद्मा, छोराहरू अनिल, अमित र आभाष खनालको नाममा राखेको भेटिएको,एक चर्चित निर्माण व्यवसायीलाई ३२ लाख ऋृण दिएको भेटिएसँगै उक्त सम्पत्ति जफत प्रक्रियामा गएको हो । खनालको नाममा रहेको एस फाइनान्समा २५ हजार ९ सय ७६,स्टान्डण्ड चार्टड बैंकमा १ लाख ७८ हजार २ सय २३,नेपाल बैंक धरान शाखामा ३ लाख १० हजार ३१३,राष्ट्रिय वाणिज्य बैंक टङ्गालमा रहेको २ लाख २१६,नेपाल बैंकमा ५७ हजार रहेको छ भने छोराको नाममा विभिन्न बैंकमा १० लाख बढी रहेको जनाइएको छ । यस्तै विभिन्न बैंकको लकरमा रहेको १५ लाख ७१ हजार ८८२ गरगहना रहेको भेटिएको छ भने काँग्रेसका नेता जीपछिरिङ्ग लामा सञ्चालक रहेको लामा कन्सट्रक्सनलाई ३२ लाख ऋृण सापटी दिएको भेटिएको जनाइएको छ । यस्तै भक्तपुरको साविक कटुञ्जे गाविस वडा नम्बर २ (क) को कुल १७ कित्ताको ४ रोपनी १ आना ३ पैसा जग्गा कसूरजन्य सम्पत्ति व्यवस्थापन विभागको नाममा लालपुर्जा कायम भएको छ । उक्त जग्गाको चल्तीको बजारमूल्य १८ करोड माथि पर्ने जनाइएको छ । टाउन डेभलपर्स कम्पनीमा रहेको ५१ सय किता शेयर जफत गरी नेपाल सरकारको राजश्व खातामा ५१ लाख पठाइसकिएको छ ।
यस्तै,रामाज्ञा चर्तुेवेदी,उनको श्रीमती र छोरा छोरीको नाममा विभिन्न बैंकमा रहेको १४ लाख बढी रकम,नेपाल मेडिकल कलेजमा रहेको ३० हजार कित्ता शेयर,ओम हस्पिटल एण्ड रिसर्च सेन्टरको नाममा रहेको ३० हजार कित्ता र शिखर पेन्टसमा रहेको ५ हजार कित्ता शेयर जफत हुने भएको हो । पर्सा र काठमाडौं ३५, काठमाडौं ७ (ख) मा रहको घर जग्गा जफत प्रक्रियामा अगाडि बढेको छ ।
आन्तरिक राजश्व कार्यालय क्षेत्र नम्बर १, बबरमहलमा नायब सुब्बा पदमा कार्यरत रहँदा उमेश कुमार रेग्मीद्धारा आर्जित अकुत रकम श्रीमती सञ्जना, सासू उषादेवी काफ्ले, जेठीसासू सुशीलाकुमारी काफ्ले, सिर्जना काफ्ले (रेग्मी) र सालो सुधीरकुमार काफ्लेलगायत आफन्तका नाममा राखिएको भेटिएपछि त्यसलाई जफत गर्ने काम टुंगोमा पुग्दै छ । कामनपा ९ को कित्ता नम्बर ६३ मा रहेको ६ आना २ दाम जग्गा, सोही जग्गामा बनेको घरदेखि त्यहाँको चल अचल जफत भइ मालपोत कार्यालय डिल्लीबजारलाई प्राप्त भइसकेको जनाइएको छ । यस्तै अजितकुमार मिश्रको नाममा रहेको काठमाडौं लाजिम्पाटमा अवस्थित ८ आना २ दाम जग्गामा बनेको घर,शकुन्तला कार्कीको नाममा रहेको काठमाडौं सिनामंगल ९ स्थित १० आना ३ दाम क्षेत्रफलमा फैलिएको घर जग्गा, भारतीय नागरिक निरञ्जन होजाइले नेपालमा निर्मल राईको नामबाट नक्कली नागरिकता बनाई अवैध सम्पत्ति जोडेको भेटिएपछि उक्त सम्पत्ति सरकारीकरण गर्ने काम अगाडि बढेको हो ।
नेपालमा झुटो परिचय बनाई ४१५९३९४ नम्बरको नागरिकता प्रमाणपत्र मात्र लिएनन्, सिन्धुपाल्चोकमा सामान्य मजदुरी गर्ने रामचन्द्र र सेती गिरीकी छोरी सरितासँग उनले २०६५ मंसिरमा विवाह गरेका थिए । निर्मल ट्रेर्डस,निर्मल राई हाउजिङ्ग एण्ड प्रोपर्टी,सरिता गिरीको नाममा विभिन्न सात वटा बैंकमा रहेको २ करोड २७ लाख ९७ हजार ३८२ रूपैयाँ कोषको नाममा स्थानान्तरण गरिदै छ । सर्वोच्चबाट फैसला भएको नौ वर्षपछि उनीहरूको नाममा रहेका सम्पत्ति सरकारीकरण हुन लागेको हो ।
यस्तै केदारनाथ ढुङ्गनाको नाममा चितवन र ललितपुरमा ३ रोपनी बढी क्षेत्रफलमा फैलिएको घर जग्गा र ९ लाख मौजाद,शिला शर्मा खड्काको नाममा ललितपुर महानगरपालिका २ (क) सानेपामा १ रोपनी ६ आना र अर्को कित्ता नम्बर १८६ मा रहेको १ आना १ पैसा जग्गाबाट आंशिक जग्गा जफत हुँदैछ । शिला खुमबहादुर खड्काकी पत्नी हुन । यस्तै दिनेश बस्नेतको नाममा विभिन्न बैंक तथा वित्त संस्थामा रहेको ८५ लाख बढी रकम जफत प्रक्रिया अगाडि बढेको विभागले जनाएको छ । यी सम्पत्तिलाई सरकारीकरण गर्ने प्रक्रिया बल्ल अगाडि बढेको विभागले जनाएको छ ।
