नयाँ सरकार गठन गर्नेबारे दुई ठुला दल नेपाली कांग्रेस र नेकपा एमालेबिच सहमति भएको छ । सोमबार मध्यरातमा कांग्रेस सभापति शेरबहादुर देउवा र एमाले अध्यक्ष केपी शर्मा ओलीबिच सहमति पत्रमा हस्ताक्षर भएको हो । सोमबार चपलीहाइटस्थित एक व्यवसायीको घरमा दुई दलबीच सत्ता सहकार्य गर्ने सहमति भएको हो । चपली हाइटस्थित व्यवसायी रामेश्वर थापाको निवासमा दुई नेताले नयाँ सरकार गठनसम्बन्धी सहमति गरेको एमालेका एक नेताले जनाएका छन् ।
बिज्ञापन
दुई दलबीच आलोपालो सरकारको नेतृत्व गर्ने सहमति भएको छ । जसमा पहिलो चरणको दुई बर्ष केपी शर्मा ओली र बाँकी अवधि निर्वाचन गराउने गरी शेरबहादुर देउवाले सरकारको नेतृत्व गर्ने सहमति भएको छ । एमालेले अर्थसहित ९ वटा मन्त्रालय र कांग्रेसले गृहसहित १० वटा मन्त्रालय लिनेछ ।
बिज्ञापन
यस्तै उनीहरुबीच संघीय मन्त्रालयको बाँडफाँडका अलवा प्रदेशको भागबण्डा पनि टुंग्याइएको ती नेताको भनाई छ । एमालेले कोशी, लुम्बिनी र कर्णाली प्रदेश सरकारको नेतृत्व गर्नेछ भने कांग्रेसले बागमती, गण्डकी र सुदूरपश्चिम प्रदेश सरकारको नेतृत्व गर्नेछ । मधेस प्रदेश सरकारको नेतृत्व मधेसवादी दललाई नै दिने सहमति बनेको हो ।
बिज्ञापन
यस्तै दुई दलबीच संविधान संशोधनका लागि सुझाव दिन एक समिति बनाउने पनि सहमति भएको छ । संविधानका कुन–कुन धारामा संशोधन गर्ने भन्ने निर्क्यौल र सुझाव दिनका लागि सर्वोच्च अदालतका पूर्व प्रधानन्यायाधीशको संयोजकत्वमा उच्चस्तरीय समिति भएको छ ।
उनीहरु संविधान संशोधन गरेर निर्वाचन प्रणाली सुधार, प्रतिनिधिसभा तथा प्रदेशसभा संख्या घटाउने, स्थानीय तहको संख्या घटाउने विषयमा पनि सहमत भएका हुन ।
त्यसअघि एमाले महासचिव शंकर पोखरेल र कांग्रेसका संसदीय दलका प्रमुख सचेतक रमेश लेखकले विनोद चौधरीको लगानी रहेको ललितपुरको भिभान्ता होटलमा बसेर सहमतिको खाका तयार पारेका थिए ।
