संघीयता कस्तो ‘गलगाँण’ भयो भने दरबन्दी छ,कर्मचारी छैनन, संघले खटाइएका कर्मचारी जनप्रतिनिधि लिन मान्दैनन् ।
बिज्ञापन
आर्थिक बर्ष अन्त्यमा अहिले संघीय मामिलामा जात्रा छ, त्यहाँ हाकिम माग्दै जनप्रतिनिधिहरु धाइरहेका छन् भने हाजिर गर्न दिइएन भन्दै फिर्ता भएका कर्मचारीको लस्कर देख्न पाइन्छ । उपमहानगरपालिकामध्ये सबैभन्दा कम जनसंख्या (१ लाख २७ हजार) भएको वारा स्थित जितपुर सिमरा उपमहानगरपालिकाका मेयर राजन पौडेल आइतबार अपरान्ह हाकिम खोज्दै सिंहदरबार आइपुगे । पालिका ६ महिनादेखि निमित्त (उपसचिव)हाकिम शिवजी प्रसादले चलाइरहेका छन् । ६ महिना अघि सहसचिव देवराज फुँयालले काम गर्न सक्दिन भनेर हिडेसँगै सो पालिका निमित्तको भरमा चलिरहेको हो । हाकिम माग्दै उनले सामान्य प्रशासनको कर्मचारी प्रशासनका सहसचिव,सचिव मुकुन्द निरौला,मन्त्री भानुभक्त जोशीमात्र होइन,सहसचिवको खटन पटन गर्ने अधिकार प्राप्त मुख्यसचिव बैकुण्ठ अर्यालसम्मलाई भेटेर दुःख बेसाए । तर,उधारो आश्वासन पाए,हाकिम पाएनन् र निराश भएर बारा फर्किएका छन् । यसरी पौडेलजस्तै प्रमुख प्रशासकीय अधिकृत माग्दै सिंहदरबारमा जनप्रतिनिधिको लर्काे लाग्ने क्रम जारी छ ।
बिज्ञापन
महानगरपालिकामा सहसचिवको दुख छैन तर उपमहानगरपालिकाको कन्तबिजोग कस्तो छ भने, अहिले ११ वटा उपमहानगरपालिकामध्ये हेटौडामा सहसचिव रामबाबु पुरी र नेपालगञ्जमा ओमबहादुर खड्का दरबन्दीमै खटिएर काम गरिरहेका छन् । यस्तै जनकपुरधाममा हालैमात्र उपसचिव टेकराज पन्थी हाजिर हुन पुगेका छन् ।
यस्तै घोराही उपमहानगरपालिकामा ऋषिराम के.सी,धनगढी उपमहानगरपालिकामा नरेन्द्रबहादुर खाती, तुल्सीपुरमा गेहेन्द्र बहादुर डाँगीलाई खटाइएको छ भने इटहरीमा रामचरित्र मेहता,बुटवलमा मित्रमणि खनाल खटिएका छन् । धरानमा प्रज्ञादेवी निरौला र कलैयामा नाथु साह खटाइएको छ ।
११ वटा उपमहानगरपालिकामध्ये २ वटामात्र सहसचिव हाकिमका रुपमा खटिएका छन् । नेपालगञ्जमा गत असोजदेखि सहसचिव ओमबहादुर खड्का प्रमुख प्रशासकीय अधिकृतको रुपमा खटिरहेका छन् भने रामबाबु पुरी केही महिना अघिमात्र हेटौंडा पुगेका हुन । बाँकी ९ उपमहानगरपालिकामा उपसचिव नै प्रमुख प्रशासकीयको भूमिका निर्वाह गरिरहेका छन् । यसरी खटिएका पनि फालिएर र पेलिएर,शक्तिकेन्द्र मिलाउन नसकेर मात्र त्यहाँ पुगेका हुन ।
बिज्ञापन
यता सिंहदरबारमा कर्मचारी थुपारिएको छ,स्थानीय तह दरबन्दीका कर्मचारी नपाएर एक तह मुनीका हाकिमलाई जिम्मेवारी दिइरहनु पर्ने स्थिति छ । जनप्रतिनिधि कर्मचारी पाइएन भन्दै मन्त्रालयमा धाँइरहँदा खटाइएका कर्मचारी जनप्रतिनिधिहरुले हाजिर गर्न दिइएनन् भन्दै धमाधम फिर्ता हुँदैछन् ।
अहिले ११ वटा उपमहानगरपालिका छन् । त्यहाँ दरबन्दी सहसचिवको राखिएको छ तर २ बाहेक ९ वटा उपमहानगरपालिकामा उपसचिव नै प्रमुख प्रशासकीय अधिकृत बनाएर खटाइएको छ । यसरी दरबन्दी सहसचिवको राख्ने,सहसचिव कोही खटाउन र पठाउन नसक्ने हो भने किन राख्नु सहसचिवको दरबन्दी ?
